ስጋዊ ርክብ እንታይ እዩ?

ስጋዊ ርክብ ብዛዕባ ግቡእ ሜላታት ምፍላጥ ጥራይ ኣይኮነን። ንናይ ነፍሲ ወከፍካ ስምዒታትን ድሌታትን ጠመተ ምሃብ፣ ሓበራዊ ምቅርራብ ምህናጽን ግቡእ ኩነታት ምፍጣርን እውን ኣገደስቲ እዮም። 

ፈተነታት ብምግባር ናትካን ናይ መጻምድትኻን ድሌት እንታይ ከምዝኾነ ፍለጥ። ብዛዕባ ቃሕታኻን ስምዒታትካን ምስ መጻምድትኻ ተዘራረብ። ብተወሳኺ ባዕልኻ እውን ክትለማመድ ትኽእል ኢኻ።

ስጋዊ ርክብ ኣብ ሕድሕድ ግዜ ዝተፈለየ ዓይነት ክኸውን ይኽእል እዩ።

ናይ ሰባት ናይ ስጋዊ ርክብ ህይወት ኣብ መዋእሎም እናተቐየረ ክኸይድ ይኽእል እዩ፣ ንኣብነት ሰውነቶም ወይ ናይ ወሲብ ናፍቖቶም (ሊብዶ) ስለዝቕየር። እዚ ንቡር እዩ። ገለ ሰባት ንነዊሕ ወይ ንሓጺር እዋን ስጋዊ ርክብ ከይገበሩ ይጸንሑ። 

ሰባት ብዙሓት እተፈላለዩ ዓይነታት ርክባትን ናይ ስጋዊ ርክብ ህይወታትን ኣለዎም። ንኣብነት: ገለ ሰባት ቅድሚ መርዓ ስጋዊ ርክብ ይጅምሩ፣ ገሌኦም ድማ ክሳዕ ዝምርዐዉ ይጽበዩ። ገለ ሰባት ሓደ/ሓንቲ መጻምድቲ ጥራይ ይሕዙ፣ ካልኦት ከኣ ምስ ብዙሓት ይጻመዱ። 

ገለ ሰባት ኣብ ወሲባዊ ስምዒታት ወይ ንጥፈታት ድሌት የብሎምን። እዚኦም ስጋዊ ርክብ ኣልቦ እዮም። ሓደ ሰብ መዋእሉ ስጋዊ ርክብ ኣልቦ ኮይኑ ከሕልፎ ይኽእል ወይከኣ ንሓጺር እዋን ስጋዊ ርክብ ኣልቦ ክኸውን ይኽእል። 

ተመሳሳሊ ጾታ ዘለዎም ሰባት እውን ንሓድሕዶም ስጋዊ ርክብ ክጋበሩ ይኽእሉ እዮም። ንገለ ሰባት እዚ ወሲባዊ ባህሪኦም (ግብረሰዶማዊነት) ዝገልጹሉ መንገዲ እዩ፣ ገሌኦም ሰባት ድማ ምስ ተመሳሳሊ ጾታ ስጋዊ ርክብ ዋላኳ እንተገበሩ ንገዛእርእሶም ከም ግብረሶደማዊ ኣይቖጽሩን። 

ኩሉግዜ ስጋዊ ርክብ ክትገብሪ እንከለኺ ብፍቓድኪ ክኸውንን ድልውቲ ክትኮኒን ኣለኪ። ስምምዕ ማለት ክልቲኦም ስጋዊ ርክብ ዝጋበሩ ሰባት ስጋዊ ርክብ ንክገብሩ ክስማዕምዑ ኣለዎም ከምኡድማ ሓዲኦም ኣብ ዝደለዩዎ ቅጽበት ስጋዊ ርክብ ከቋርጹ መሰል ከምዘለዎም ዝገልጽ እዩ።

ዝኾነ ሰብ ኣገዲዱ ናብ ስጋዊ ርክብ ከእትወኪ ከይትፈቕዲ።